Փախլավա (կամ բակլավա), տարածված հրուշակեղեն, որը պատրաստվում է շերտավոր խմորից օշարակի մեջ թաթախված ընկույզով։ Այն լայնորեն տարածված է Մերձավոր Արևելքի ժողովուրդների խոհանոցում, ամենից շատ՝ հայկական,արաբական և թուրքական։

Պատմաբան Նուրի Ջանլիի խոսքերով՝ քաղցրավենիքի մասին առաջին հիշատակումը վերաբերում է 15-րդ դարին։ «Փախլավայի համար բարակ խմոր պատրաստելու ավանդույթը եկել է ասորիներից։ Սուլթան Մեհմեդ Երկրորդի ժամանակների խոհարարական գրքի համաձայն՝ առաջին փախլավան պատրաստվել է 1453 թվականի օգոստոսին արքայական պալատում։ Ասում են, որ սուլթանին այնքան է դուր եկել խոհարարի հայտնագործությունը, որ նա հրամայել է հավերժացնել նրա բաղադրատոմսը։ Այդ օրվանից փախլավա պատրաստում են ամեն տոնի ժամանակ»։

Անհրաժեշտ բաղադրիչներ՝

յուղ – 350 գր․

թթվասեր – 300 գր․

ձվի դեղնուց – 4 հատ

ձվի սպիտակուց – 4 հատ

ալյուր – 800 գր․

սոդա – 1 թ/գդ

շաքարավազ – 2,5 ճ/գդ

ընկույզ – 400 գր․

մեղր – 2 ճ/գդ

Պատրաստման եղանակը՝

Ալյուրը յուղի հետ լավ խառնել, ավելացնել 3 ձվի դեղնուցը, թթվասերն ու սոդան, խմոր հունցել, գնդել եւ 1 ժամով տեղափոխել սառնարան:

Խմորը հանել սառնարանից, բաժանել 8 գնդերի: Պատրաստել միջուկը: Ընկույզները մանրացնել, վրան լցնել 4 ձվի սպիտակուցներն ու շաքարավազը եւ լավ խառնել: Գնդերն ալյուր ցանած սեղանի վրա լավ գրտնակել:

Յուղապատ տապակի մեջ դնել խմորներն ու յուրաքանչյուրի արանքում միջուկ լցնել: Վերջին շերտի վրա միջուկ չլցնել: Քսել ձվի դեղնուցը, դանակով կտրատել։ Ցանկալի է զարդարել ընկույզներով: Փախլավան տեղափոխել նախօրոք 200 աստիճան տաքացրած ջեռոցը։ Թխել 45-50 րոպե:

Պատրաստ լինելուց 5-10 րոպե առաջ ջեռոցից հանել, վրան լցնել յուղի եւ մեղրի խառնուրդը, ապա կրկին տեղափոխել ջեռոց: